تہران: ایران کے پٹرولیم وزیر محسن پاک نژاد نے دعویٰ کیا ہے کہ امریکا کے ساتھ 40 روزہ جنگ کے دوران ایران کی خام تیل کی برآمدات ایک گھنٹے کے لیے بھی بند نہیں ہوئیں۔سرکاری نشریاتی ادارے پریس ٹی وی کے مطابق محسن پاک نژاد نے کہا کہ 28 فروری سے عارضی جنگ بندی تک جنگی حالات، تیل و گیس کی تنصیبات پر حملوں اور شدید لاجسٹک مشکلات کے باوجود ایران نے خام تیل کی برآمدات جاری رکھیں۔ایرانی وزیر کے مطابق امریکی کارروائیوں اور اس کے بعد پیدا ہونے والی بحری ناکا بندی نے تیل کی ترسیل کو مشکل بنایا، تاہم اس کے باوجود ایران کی تیل برآمدات میں مکمل تعطل نہیں آیا۔ایرانی حکام کا یہ دعویٰ ایسے وقت میں سامنے آیا ہے جب جنگ کے دوران ایران کی توانائی تنصیبات اور سمندری نقل و حمل کو شدید دباؤ کا سامنا رہا۔ تہران کے مطابق اس کے باوجود تیل کی برآمدات کا سلسلہ برقرار رہا۔
