دوسرےٹی20 میچ میں آسٹریلیاکے148رنزکے ہدف کے تعاقب میں پاکستانی ٹیم 133 پر آؤٹ ہوگئی اور 13 رنز سے ہارگئی جس کے ساتھ ہی آسٹریلیانے ٹی ٹوئنٹی سیریز بھی اپنے نام کرلی۔ پاکستان کیخلاف سیریز کے دوسرے ٹی20 میچ میں آسٹریلیا نے پہلے بیٹنگ کرتے ہوئے 9وکٹوں کے نقصان پر 147 رنزبنا کرپاکستان کوجیت کے لیے 148رنزکاہدف دیاتھا۔ پاکستان کی آسٹریلیا کے خلاف پہلی وکٹ 12 رنز پر گر گئی جب بابراعظم صرف 3 رنز بنا کر پویلین لوٹ گئے، اس کے بعد صاحبزادہ فرحان 5 رنز بنا سکے اور اس طرح 17 رنز پر پاکستان کے دوسرے کھلاڑی میدان سے باہر چلے گئے، کپتان محمد رضوان 16 بنا کر آؤٹ ہوئے تو قومی ٹیم کا مجموعی اسکور 44 رنز تھا، اس کے فوراً بعد نائب کپتان سلمان علی آغا بھی پویلین لوٹ گئے، بعد ازاں عثمان خان 52 رنز بنا کر کیچ آؤٹ ہوئے تو پاکستانی ٹیم 102 رنز پر پہنچ چکی تھی۔پاکستان کی چھٹی وکٹ 106 رنز پر گری،پاکستان کی ساتویں وکٹ 107 رنز پر گر گئی اور شاہین شاہ آفریدی بغیر کھاتہ کھولے بولڈ ہو گئے۔ قبل ازیں سڈنی میں کھیلے جانے والے میچ میں آسٹریلوی اوپنرز نے جارحانہ کھیل کا مظاہرہ کرتے ہوئے ابتدائی تین اوورز میں ہی ٹیم کا اسکور 52 رنز تک پہنچا دیاتھا، تاہم متھیو شارٹ 32 اور جیک فریزر میک گرک 29 رنز پر پویلین لوٹے جبکہ کپتان جوش انگس صفر پر ہی پویلین لوٹ گئے،دیگر کھلاڑیوں میں گلین میکسویل 21، مارکس اسٹوئنس 14اور ٹم ڈیوڈ 18 رنز بناکر آؤٹ ہوئے،میزبان ٹیم مقررہ اوورز میں 9 وکٹوں کے نقصان پر 147رنزبناسکی۔ پاکستان کی جانب سے حارث رؤف نے 4 ،سفیان مقیم نے 2 جبکہ عباس آفریدی نے 3 وکٹیں حاصل کیں۔ سڈنی میں کھیلے جانے والے اس میچ میں آسٹریلوی ٹیم کے کپتان جوش انگلس نے ٹاس جیت کر پہلے بیٹنگ کا فیصلہ کیا،اس موقع پر ان کاکہناتھاکہ میچ میں فتح کیساتھ سیریز اپنے نام کرنا چاہتے ہیں۔ قومی ٹیم کے کپتان محمد رضوان نے اس موقع پر کہا کہ میچ میں کامیابی سمیٹ کر سیریز برابر کرنا پہلا ہدف ہے، پلیئنگ الیون میں ایک تبدیلی کی گئی ہے،حسیب اللہ خان کی جگہ سفیان مقیم کو شامل کیا گیا۔ پاکستانی اسکواڈ کپتان محمد رضوان، بابراعظم، صاحبزادہ فرحان، عثمان خان، سلمان آغا، عرفان خان، عباس آفریدی، شاہین شاہ آفریدی، حارث رؤف، نسیم شاہ اور سفیان مقیم پر مشتمل تھا۔ دوسری طرف آسٹریلین اسکواڈ میں کپتان جوش انگلس، جیک فریزر، میک گرک، میٹ شارٹ، گلین میکسویل، ٹم ڈیوڈ، مارکس اسٹوئنس، آرون ہارڈی، زیویئر بارٹلیٹ، نیتھن ایلس، ایڈم زمپا اور اسپینسر جانسن شامل تھے۔
