نومبر 20, 2026

بغیر جم 11 ماہ میں 52 کلو وزن کم کرنے والی طالبہ کی متاثر کن کہانی

تیونس سے تعلق رکھنے والی 22 سالہ طالبہ نے صرف 11 ماہ میں بغیر جم گئے 52 کلو گرام وزن کم کر کے سب کو حیران کر دیا۔بھارتی میڈیا کے مطابق ہبہ اللّٰہ عیادی نامی طالبہ نے اپنے وزن میں کمی کے سفر کو متاثر کُن قرار دیتے ہوئے اسے سوشل میڈیا پر شیئر کیا ہے۔اب ہبہ عیادی کا وزن 133.3 کلو گرام سے کم ہو کر 52 کلو گرام رہ گیا ہے۔5 فُٹ 8 انچ قد کی حامل ہبہ کا کہنا ہے کہ زیادہ وزن میرے لیے صرف ظاہری خوبصورتی کا مسئلہ نہیں تھا بلکہ میری مجموعی صحت، تھکن اور خود اعتمادی سب متاثر ہو چکے تھے۔
ایک دن وزن دیکھ کر میں نے اپنی زندگی بدلنے کا فیصلہ کیا اور وزن کم کرنے کی ٹھان لی۔
سادہ خوراک، مستقل عادت
ہبہ عیادی کا کہنا ہے کہ میں نے خود کو بھوکا نہیں رکھا بلکہ سادہ اور متوازن غذا اپنائی۔
ان کا کہنا ہے کہ میں ناشتے میں صرف سبزیوں کے ساتھ 3 انڈوں کا آملیٹ، تھوڑی سی بران بریڈ اور بغیر چینی کے چائے یا کافی کا استعمال کرتی تھی۔دوپہر کے کھانے میں محدود مقدار میں چاول یا روٹی، چکن یا انڈے، سبزیاں اور ایک پھل کھاتی تھی جبکہ رات کا کھانا کم سے کم اور ہلکا رکھتی تھی جس میں کم تیل اور نمک کے ساتھ سوپ یا کبھی صرف سلاد کھا لیا کرتی تھی۔
جم نہیں، صرف واک
ہبہ کے مطابق جم جانا ممکن نہ ہونے پر میں نے روزمرہ زندگی میں واک کو شامل کیا، باقاعدگی سے کی جانے والی چہل قدمی نے وزن کم کرنے کے ساتھ ساتھ ذہنی سکون بھی دیا۔
جذباتی جدوجہد اور حوصلہ
ہبہ عیادی کا کہنا ہے کہ وزن زیادہ ہونے کا سب سے مشکل پہلو جذباتی تھا، میں آئینہ دیکھنے سے کتراتی تھی اور کپڑے فٹ نہ آنے اور صحت کی فکر مجھے پریشان رکھتی تھی جبکہ اب میں وزن میں واضح کمی کے بعد خود کو توانا اور بہتر محسوس کرتی ہوں۔
نوٹ: یہ مضمون قارئین کی معلومات کیلئے شائع کیا گیا ہے، صحت سے متعلق امور میں اپنے معالج کے مشورے پر عمل کریں۔