ایک نئی تحقیق میں انکشاف ہوا ہے کہ صارفین اکثر کھانے کی اشیا کی شیلف لائف کو ان کی قدرتی اور ماحول دوست ہونے کی علامت سمجھ لیتے ہیں حالانکہ شیلف لائف ہمیشہ اس بات کا قابلِ اعتماد پیمانہ نہیں ہوتی۔جرنل آف کنزیومر سائیکالوجی میں شائع ہونے والی تحقیق کے دوران مختلف تجربات کیے گئے۔ایک تجربے میں شرکا کو ایسے آلو کے چپس کا موازنہ کرنے کو کہا گیا جن کی شیلف لائف بالترتیب پانچ اور نو ماہ تھی۔ شرکا نے کم شیلف لائف والے چپس کو زیادہ قدرتی اور صحت بخش قرار دیا جبکہ زیادہ شیلف لائف والے چپس کو ماحول دوست اور خوراک کے ضیاع میں کمی کے لیے بہتر سمجھا۔ایک اور تجربے میں شرکا کو ایسی پاستا ساسز میں سے انتخاب کرنا تھا جن کی شیلف لائف ایک اور تین سال تھی۔ جب انہیں قدرتی غذاؤں کی اہمیت پر توجہ دلائی گئی تو تقریباً 70 فی صد افراد نے ایک سال شیلف لائف والی ساس کا انتخاب کیا۔ تاہم، جب ماحول کے تحفظ کی اہمیت اجاگر کی گئی تو یہ شرح کم ہو کر 43 فی صد رہ گئی۔محققین کے مطابق نتائج ظاہر کرتے ہیں کہ صارفین بعض اوقات شیلف لائف کو خوراک کی قدرتی خصوصیات اور ماحولیاتی اثرات کے بارے میں ایک سادہ اشارے کے طور پر استعمال کرتے ہیں، جو ہمیشہ درست نتیجے تک نہیں پہنچاتا۔
