امریکی ٹیکنالوجی کمپنی این ویڈیا کے چیف ایگزیکٹو آفیسر جینسن ہوانگ نے دعویٰ کیا ہے کہ چیٹ جی پی ٹی کا تازہ ترین ورژن آرٹیفیشل جنرل انٹیلی جنس (اے جی آئی) کی پہلی مثال ہے۔ اس کو انسانی سطح کی مصنوعی ذہانت بھی قرار دیا جاتا ہے۔رپورٹ کے مطابق اوپن اے آئی نے گزشتہ ہفتے اپنا نیا جی پی ٹی-6 ماڈل متعارف کرایا جسے چیٹ جی پی ٹی آسٹرا کا نام دیا گیا ہے۔نئے ماڈل نے مختلف بینچ مارک ٹیسٹس میں متاثر کن کارکردگی کا مظاہرہ کیا جس کے باعث اسے اینتھروپک کے کلاؤڈ اور گوگل کے جیمینائی جیسے حریف ماڈلز سے نمایاں قرار دیا جا رہا ہے۔اوپن اے آئی کے مطابق نیا ماڈل کمپیوٹر استعمال کرنے، ویب براؤزنگ، سافٹ ویئر انجینئرنگ، سائبر سیکیورٹی، سائنسی اور پیشہ ورانہ کاموں میں جدید ترین صلاحیتوں کا حامل ہے اور بیک وقت متعدد کام خودمختاری سے مکمل کر سکتا ہے۔ایک مظاہرے کے دوران نئے اے آئی ماڈل نے صارف کی درخواستوں کا جواب دینے کے ساتھ ساتھ پیچیدہ کام بھی بیک وقت انجام دیے، جن میں ویڈیو گیم تیار کرنا اور قانونی دستاویز تیار کرنا شامل تھا۔نئے ماڈل کی رونمائی کے بعد این ویڈیا کے سی ای او جینسن ہوانگ نے سوشل میڈیا پلیٹ فارم ایکس پر اپنے پیغام میں اوپن اے آئی ٹیم کو مبارکباد دیتے ہوئے لکھا کہ اے جی آئی آ چکا ہے، اوپن اے آئی ٹیم کو مبارک ہو۔
